Husddnsafdd und gelber Sagg

Eine Erörterung zur Müllabfuhr
Kann auf Wunsch auch vom Fränkischen ins Hochdeutsche transskribiert werden

Woss däi midanandder z´dou homm? Dess wärdd´s glei sehng.
Allzo, neili hodd mer der Doggdär an Husddnsaffd verschriem. Dass i gscheid abhousdn koo, verschdessd? Nu gscheider wäärs fraali, wenn iich ess Raung aafhäärn dääd, hoddär gsachdd. Ii glabb, dess is a ganzer Gscheider, där. Mechdd närblouß wissn, woss denn mei Raucherei  oogäidd, denn Dolddi, oddä?
Iich hobb denn Husddnsaffd eignummer wäi bann Friischobbn und nacherer Stund hobbi an Housderrer dou mäin, dass glei in gelm Sagg in der Kichn zrissn hodd. Obber nedd blouß denn, woss scho full woor, sondern aa däi, woss nu aafgrolldd woorn. Su goud is där Husddnsaffdd.
Dess woor obber nedd es erschdde Mool, dass ba mir dahamm an gelm Sagg zrissn hodd, sondern aa scho ganz ohne den goudn Husddnsaffdd. Neemli immer wenn i denn Sagg nausdroong hobb, hoddsn zrissn und di ganz Boddschaari is in Gaddn rumgleeng, verschdessd?
Nacherdler hobber mer dengdd: Edz dou i den gelm Sagg amool in an blauer nei, däi woss ma kaffn koo, verschdessd, ees Stigg fiir fimbf Euro. Und denn blauer middn gelm Sagg drin hobb nausgschdelldd.
Glabbd´s, däi häddn denn miidgnummer? Wassd scho, däi vo derer Firma Müllmann odder wäi däi hassd, in Bäicherbooch driim, däi woss hindn droom stenner und um sei Leem renner, wenn der ander midd sein gelm Lasddwoong oohälldd. Brouder, där konn vielleicht foohrn! In´d Kurvn nei und hinner und widder, wäi a Zirgussreider, dess mouß amool gsachdd sei, verschdessd?
Obber edzerler wäär i ball wechkummer.
Allzo, däi homm denn blauer fei nedd miidgnummer. Nedd amol neigschaud homms. Des dääd iich fraali aa nedd, wall ba manche gräigsd scho blouß von Hiischauer a Bloudvergifddung. Salmonelln su grouß wäi Eideggsn senn dou drinna.
A Zedderler homms hiighängdd: Ein gelber Sack gehört nicht in einen blauen und lauder suu a Gschmarri.
Hobber mer dengdd, wadd ner, Freindler!
Ess neggsde Mool hobb i manne ganzn Gebisser, woss i aafghuum hobb fiir die Alddersversorchung, wassd scho, weecher denn Gold, wos dou droo is, in an blauer Sagg nei. Achdderhalb Pfund hodder gwuung. Wall in gweeng hobb. Und vo denn senn mindesddens dreißg Gramm Gold. Dou mou mer si doch as Maul ooschleggn, oddä?
Und ummer dreivärddl siemer bin i aafgstanddn, walls um siemer kummer, und hobb mi hinddern Bamm verschdeggd. Wall i sunsdd obber erschd ummer siemer aafstäih, bin i haldd widder eigschloufn hinddern Bamm. Ummer aans Middooch hodds grumbldd und bfiffn und gschebberdd, daß iich aafgwachdd bin, und kummer senns. Iich hobb edzerdler goud ausgschloufn ghadd und hobb alles ganz genau gseeng. Der anne hodd denn blauer Sagg aafgmachdd, hodd neigschaud und widder sei Zedderler drooghängdd, des Rimbfiech. Sei ganze Alddersversorchung woor hii. Aff ann Schlooch. Kennder eich dess vuurschdelln?
Harch, hobb iich glachdd hinddern Bamm und hobb däi achdderhalb Pfund widder midd neignummer.
Seideem lou iich mir kann Husddnsaffdd nemmer verschreim von Doggdär, verschdessd? Und wenni denn gelm Sagg nausdrooch affd Schdrass, mouß i blouß Obachdd geem, daß ka Kunsdd-Mänädscher drassn vorbeigäihd, wall där neemli sunnsd nu sachd, mei Gaddn is a Kunsddwerg, und iich mouß nern in Zukumbfd am Sunndooch aafmachn firr des offne Kunsdd-Denggmool oddä wäi dess hassd. Bin iich bläid, dass mer nou a jeder neibrunzn koo, oddä woss? Dess braugsd fei nedd glaam. Und a su a Kunsdd is dess aa nedd, wenn anner in andern sein Gaddn neibrunzdd, verschdessd?
Ja fraali, und där, denn woss däi Firma Müllmann ghäärd odder wäi däi hassd, där soll rouhich amool an gscheidn Schobbm Husddnsaffdd eigeem, dasser sichdd, wosser fiir a Glumb hodd midd sanne gelm Sägg, oddää?
Ach suu, in Doggdär wolldär aa nu wissen. Nedd schlechdd, Herr Geislbrechdd.
Allzo, dess is där midn gelm Sagg… haldd, edzerdla bin i scho ganz durchanandär… dess is der Doggdär Eisnboord vo dä Razznmüühl, zwischer Dalmessing und Hibbolddschdaa, ungefäär in der Middn, glei linggs, verschdessd?